Os seus camións están nunha finca de Ribadumia na que cea a
miúdo a cúpula do PP, incuído Rajoy. A construtora logra tantas contratas que
varias veces a Deputación de Pontevedra admitiu no BOP que non lle podía alugar
máis camións porque xa os tiña todos traballando para a propia Deputación.
"Todo está legal".
Áridos de Curro S.L. (Aricur) recibiu da Deputación de
Pontevedra máis de 502.000 euros nos últimos
seis anos. O administrador único
da empresa, segundo se pode comprobar no Rexistro Mercantil, é Juan Luís Abal
Piñeiro, primo segundo do presidente da Deputación, Rafael Louzán Abal (PP).
Aricur gañou 15 adxudicacións neste tempo, varias delas
mediante concursos sen publicidade ou a través da prolongación das contratas.
As adxudicacións a Aricur son tan constantes que polo menos dúas veces a
Deputación tivo que admitir no seu propio Boletín (BOP) que non lle adxudicaba
máis
contratos á constructora porque Aricur xa lle alugara todos os seus
camións á propia Deputación.
Versión da Deputación
Consultada a Deputación sobre estes feitos, fontes oficiais
explicaron que "todo o relacionado con Áridos de Curro está legal".
As mesmas fontes admiten que hai unha relación "familiar" entre
Louzán e a empresa, relación que cualifican, iso si, de "moi, moi
lonxana".
Ademais insisten en que Áridos de Curro xa traballaba para a
Deputación antes de que Rafael Louzán fose presidente. Os voceiros oficiais
defenden a legalidade dos procedementos nesa administración até o punto de
invitar a todos os medios a consultar calquera expediente.
"O Atranco", merendeiro do PP e garaxe para a
Deputación
Os dous primos, Abal Piñeiro e Louzán Abal, manteñen unha
boa relación. Juan Luís Abal é quen tramita os permisos administrativos para a
finca "O Atranco" en Ribadumia. Cando Mariano Rajoy comezou o seu
veraneo o último agosto, Louzán (presidente do PP de Pontevedra) invitouno a el
e a cúpula do PP galego a cenar na finca do seu primo segundo, tras dar un
paseo pola beira do Umia ao
que convocaron á prensa.
En realidade as cenas da elite conservadora na finca do
primo de Louzán son frecuentes. Está situada ao pé do Río Umia, por cuxa beira
a Deputación inagurou un paseo fluvial hai uns meses.
A ruta discurre todo o camiño pola banda esquerda do río. En
Ponte Cabanelas, xusto cando a ruta chega ao Atranco, a Deputación decidiu que
o sendeiro pase á beira dereita, evitando finca de Abal Piñeiro.
Por petición de Abal Piñeiro, en 2010 a
Deputación de
Pontevedra autorizoulle ao Atranco un embarcadeiro. O Boletín Oficial de Pontevedra
especifica que a obra non debe "impedir o paso pola zona de
servidume". Porén, podese comprobar que toda finca está valada, violando a
liberdade de paso que a Lei fixa para a beira de todos os ríos. De feito, a
finca non só ten unha cancela todo ao redor, senón tamén está vixiada con cans
e cámaras de seguridade.
Que xustifica tal vixilancia no Atranco, que está a uns
centos de metros da casa natal de Louzán, ademais das cenas cos líderes do PP?
Podese comprobar que na finca gárdase maquinaria de obra que, segundo fontes da
oposición, traballa en contratas da Deputación de Ribadumia, parte dela
propiedade de Aricur.
Todos os anos a Deputación aluga unha pala e dous camións a
Aricur
Estas son adxudicacións a Aricur, a empresa do primo segundo
de Louzán, nos últimos sete anos, a cuxa documentación accedeu Galicia
Confidencial. Os prezos están sen IVE. A suma global con IVE supera os 502.000
euros:
En 2006 Aricur recibiu 7.000 euros polo aluguer dunha pala,
5.600 polo alugamento dun camión e outro 10.500 euros polo alugamento doutro
camión. Estas contratas fixéronse sen un concurso de seu. Como outras 59
adxudicacións, a Deputación tramitounas "ampliacións" dun concurso
anterior, que esta Administración prolongou porque estimaba que se lle estaban
a agotar as horas alguadas e os subministros para obras.
O 2 de xaneiro de 2008 Aridos de Curro era unha das máis
beneficiadas polos 47 lotes nos que a Deputación decidiu dividir o subministro
para as súas obras. Así fíxose con 22.400 euros polo aluguer dun camión, 28.000
polo aluguer dunha pala e 21.000 polo aluguer doutro camión.
Non se fixo con outro lote para alugar un camión simplemente
porque Aricur non lle quedaban ningún máis.
"Declárase deserto o lote número 37 correspondente ó
aluguer de camión 2x1/2x2 PMA 18/20 Tm., debido a que as empresas que
presentaron proposicións económicas ó mesmo, José Rubén Rozados e Hijos, S.L.,
Áridos de Curro, S.L. (ARICUR) e Transportes Ramón Abal Abal, xa resultaron
adxudicatarias de outros lotes e non dispoñen de máis vehículos destas
características", di a Resolución.
É dicir, de todas as empresas con camións da provincia de
Pontevedra só se presentaron a ese lote tres empresas con tan poucos camións
que se lle esgotaron porque a Deputación xa llos contratara todos antes.
En setembro de 2008 a empresa da familia de Louzán facíase con
máis de 37.500 euros polo aluguer de 500 horas dunha máquina retro-excavadora
para a Deputación. A documentación oficial explica que foi unha
"Resolución Presidencial", é decir unha iniciativa do propio Louzán,
quen mandou pedir prezo unciamente a Aricur e a outras dúas empresas (Alfonso
Mouriño Ameal e Áridos y Saiar). As dúas compañías con Aricur son das que acostuman
a traballar para a Deputación, de feito Alfonso Mouriño tamén é hoxe un dos
maiores contratistas da Deputación tras botar anos traballando como obreiro nas
súas contratas.
En xullo 2088
a Deputación xa lle contratara 25.500 euros de material
de obra polo mesmo procedemento sen prublicidade. Unha "Resolución"
de Louzán mandara pedir prezo solamente a Aricur, Alfonso Mouriño Ameal e outra
das empresas beneficiadas en anteriores obras, Álvaro Piñeiro Chaves.
En 2009 Aricur faise con 23.000 euros por alugar un camión,
28.000 pola pala e 21.000 polo outro camión.
En 2011 a
Deputación dividiu en 71 lotes o alugueiro de maquinaria e subministro de
materiais. Aricur apaña desta volta 27.800 euros polo alguer dunha pala, 21.700
polo alugueiro dun camión e 23.000 polo alugueiro doutro camión. Ao igual que
en 2008, a
empresa do Primo de Louzán non gaña outro lote porque xa non tiña máis camións
que alugar.
Concurso sen publicidade hai uns meses
Por último, en outubro de 2012 Aricur gaña o concurso
negociado sen publicidade para ensanchar a estrada E.P. 7102 entre Serapio e
Portelo, en Cercedo. A Deputación só lle pediu prezo á firma da empresa de
Louzán e a Canalizaciones y Construciones Salnés e Construcciones Eiriña.
O concurso non saíu publicado en ningures. Este xeito de
adxudicar é unha vía legal pero opaca, que as administracións só poden usar
para contratos menores, urxentes ou cando hai poucas empresas capacitadas para
facer o traballo. Ningunha destas circunstancias concurría a priori na
ampliación dunha estrada comarcal. Aricur ingresou 124.000 euros por esta obra.
Unha rede de pequenas constructoras vive case exclusivamente
da Deputación
De acordo aos boletíns oficiais, Aricur non ten ningunha
outra contrata con administración algunha que non seña a Deputación de
Pontevedra. Non é un caso excepcional, pois ducias de pequenas empresas de
obras da provincia, a maioría baseadas na Comarca do Salnés que viu nacer a
Louzán, traballan case exclusivamente para a Administración que preside o
ex-concelleiro de Ribadumia.
O motivo deste continúo orballo de contratos é que a
Deputación non licita todo o seu parque móbil ou subministros nun gran lote por
varios anos, o que lle permitiría aforrar. Polo contrario, o parque móbil e os
subministros divídense en ducias de lotes case idénticos cada ano -as veces
máis de 70 nun só exercicio.
Isto permite que dende hai lustros un grupo de empresas da
construcción de Pontevedra subsista en exclusiva das adxudicacións recurrentes
da Deputación. Aricur é só unha delas.
Fonte: Galicia Confidencial